NOVAS DO CONCELLO

NOVAS O CONCELLO DE SOBER CONVOCA O CONCURSO DE DESEÑO GRÁFICO DO QUE SAIRÁ O CARTEL ANUNCIADOR DA XXXVII FEIRO DO VIÑO DE AMANDI O Goberno local do Concello de Sober convoca un concurso de deseño gráfico co fin de elixir o cartel anunciador da XXXVII Feira do Viño de Amandi, que se celebrará o 8 e 9 de abril de 2017, de acordo coas bases que vén de facer públicas a través da súa web e das redes sociais.   Poderá concorrer toda a poboación, con traballos en formato A3 e técnica libre. Deberán ser presentados en soporte ríxido para facilitar a súa exposición. Só se pode presentar un cartel por autor ou autora.   Quedan exentas, tal e como se acordou o pasado ano, aquelas persoas que teñan recibido o premio cando menos en dúas ocasións para permitir así o acceso a novos creadores.   Temática Os deseños deben reflectir o espírito da Feira do Viño de Amandi facendo especial fincapé no sector vitivinícola e no noso patrimonio e cultura.   Os traballos presentados quedarán en poder do Concello de Sober. O deseño gañador será empregado como cartel anunciador da XXXVII Feira do Viño de Amandi, así como nos programas de man. Os restantes carteis presentados poderán ser expostos se o Concello así o considera.   O cartel gañador será propiedade do Concello de Sober, quen poderá cedelo a terceiros. O autor ou autora renuncia a todos os dereitos de explotación, só conservarán os dereitos de autor para incluílo no seu currículo.    Cómo participar Os traballos deberán ser presentados nun sobre pechado co lema do cartel, sen ningunha forma de identificación. Noutro sobre levará escrito o lema e no seu interior deberá conter os datos do autor, tales como o nome, o enderezo e o teléfono de contacto. O cartel terá que levar de xeito obrigatorio os seguintes compoñentes: XXXVII Feira do viño de Amandi Festa de Interese Turístico. A páxina web www.concellodesober.com. A data de celebración, 8 e 9 de abril e os logotipos das redes sociais do Concello Facebook e Twitter.   A entrega de orixinais farase na Casa do Concello dende a data de convocatoria destas bases, o 9 de decembro, ata o día 20 de xaneiro. O horario de entrega será de 10:00 a 14:00 horas. Tamén poden ser enviados por correo postal ao Concello de Sober.   Xurado e premio O xurado emitirá o seu fallo 10 días despois do peche da convocatoria. Estará formado por persoas cualificadas na materia, reservándose a facultade de declarar deserto o premio no caso de que estimase que ningún dos traballos reúne os méritos suficientes. Establécese un premio ao traballo gañador valorado en 600 euros.   Os participantes someteranse á decisión do xurado, que resolverá sobre calquera dúbida non prevista nas presentes bases. No caso de facerse unha entrega pública ao gañador ou gañadora este comprométese a recoller persoalmente o premio ou facerse representar debidamente no acto.   O gañador entregará unha copia do cartel en formato dixital que permita o seu proceso informático e inserirá os logotipos das entidades patrocinadoras facilitadas polo Concello de Sober para a súa publicación. O simple feito de presentación ao concurso supón a aceptación plena destas bases.