NOVAS DO CONCELLO

NOVAS O CONCELLO DE SOBER PORÁ EN FUNCIONAMENTO NO MES DE XUÑO UNHA OFICINA COWORKING PARA PEMES E EMPRENDEDORES O Concello de Sober porá en funcionamento no mes de xuño unha oficina coworking dotada cun mínimo de 6 postos individuais con fibra óptica para pemes e emprendedores.   As instalacións que o Goberno local vai habilitar estarán emprazadas na primeira planta da Oficina de Turismo na Praza do Concello e ocuparán arredor de 70 metros cadrados.   A oficina poderá ser empregada por veciños e veciñas do Concello de Sober que necesiten teletraballar e non dispoñan de rede adecuada nos seus domicilios e tamén para aquelas pemes ou emprendedores que non teñan un local no que traballar.   O espazo cooworking municipal está especialmente indicado para os profesionais que realicen a maior parte do seu traballo con medios informáticos.   Cumprimento da normativa de seguridade Todos eles disporán de conexión a Internet mediante fibra óptica e mobiliario básico de oficina, cumprindo a normativa de seguridade e distanciamento social referida á prevención do COVID-19.   O Concello de Sober encargarase dos labores de limpeza e desinfección dos postos de traballo e comunicará aos usuarios as medidas hixiénicas e de uso que deberán cumprir durante a súa estancia no recinto.   Axuda aos emprendedores O obxectivo é poder axudar a pequenas empresas, emprendedores e profesionais do Concello de Sober que non poidan facer fronte ao pagamento de alugueres de locais ou non teñan conexión á rede nas súas vivendas, vendo así perigar a continuidade do seu negocio.   O Concello de Sober elaborará un regulamento de uso que permita organizar o espazo e establecerá un prezo simbólico para dispor das instalacións e organizar horarios.   A asignación dos espazos de traballo realizarase por orde de recepción de solicitudes, que poderán facerse por vía telemática ou chamando ao Concello de Sober, unha vez se publique o regulamento.