NOVAS DO CONCELLO

NOVAS O CONCELLO DE SOBER FELICITA A MANUEL GONZÁLEZ RODRÍGUEZ, DE LIÑARÁN, PREMIADO NUN CERTAME NACIONAL DE DESEÑO O Concello de Sober felicita a Manuel González Rodríguez, con raíces en Liñarán, polo seu premio no certame nacional de deseño ‘Rado Star Prize Spain’, que tivo lugar no marco do Madrid Design Festival.O obxectivo do certame é promover ás novas promesas do deseño, dándolles unha plataforma para mostrar o seu traballo.   Na actualidade o mozo de 34 anos atópase rematando o ciclo de ebanistería artística na Escola de Arte e Superior de Deseño (EASD) Antonio Faílde, en Ourense, e este verán planea abrir un taller de artesanía en Liñarán.   O concurso Manuel González participou neste concurso no que preseleccionaron a 9 participantes que foron os que pasaron á final. O seu traballo foi seleccionado por un xurado de profesionais do mundo do deseño e a semana pasada estivo exposto nas xornadas ‘Madrid Designe Festival’, no Colexio Oficial de Arquitectos de Madrid (COAM).   O soberino presentou a peza ‘Sestrelo’, unha mesiña auxiliar que tamén serve de asento. A idea de sestrelo vén da palabra orixinaria ‘setestrelo’ que na cultura galega denomina a constelación da osa maior coas súas sete estrelas ben marcadas.   A súa peza conseguiu o premio do público, que consistía nun reloxo da marca suíza RADO e na posibilidade de expor a súa creación. Manuel González traballa xa noutras pezas, concretamente na confección dunha cama de can ca técnica de dobrado de madeira.