NOVAS DO CONCELLO

NOVAS O CONCELLO DE SOBER APROBA UNS ORZAMENTOS PARA 2020 QUE REFORZAN O GASTO SOCIAL O Concello de Sober vén de aprobar, cos votos a favor do Grupo de Goberno e a abstención de Agroma Sober e o PSOE, uns Orzamentos para 2020 nos que prima o gasto social e o investimento público.   O orzamento ascende a 2.805.000 euros e o alcalde, Luis Fernández Guitián, destaca que se trata dunhas contas “que fan da perspectiva de xénero un asunto transversal, que se tivo en conta en todas as políticas, plans e programas que se van a desenvolver para transmitir unha imaxe efectiva igualitaria, plural e non estereotipada de homes e mulleres na sociedade”.   Ingresos No capítulo de ingresos, o Goberno local baixa a taxa do lixo nun 10%, ao tempo que non se sobe ningún imposto nin taxa municipal (gardería, IBI, vehículos, escola de música, auga e saneamento).   Gastos No apartado de gastos, o Concello prima o gasto social ao que destina preto de 800.000 euros. Contémplase un importante incremento no salario para as Auxiliares de Axuda no Fogar, arredor dun 6% (por uso de vehículo propio), máis o 2% que corresponde coa suba estatal, e contémplase un 0,3% adicional.   Outras medidas Mantense o Servizo de Conciliación no CEIP Plurilingüe Virxe do Carme, gratuíto con xornada de mañá e tarde.   Amplíase a dotación das becas de transporte universitario e as axudas para alumnos de BAC.   Amplíase a dotación das axudas aos clubs de Fútbol e seguirá habendo axudas para deportistas individuais.   Obxectivo, débeda cero O rexedor explica que o Goberno que preside segue a rebaixar a débeda viva co obxectivo de rematar o ano con débeda cero.   Outros investimentos O Concello de Sober fará ademais un importante esforzo na mellora da rede de saneamento e abastecemento (ao que destina 430.000 euros), nas infraestruturas viarias (250.000 euros) e no impulso do turismo (máis de 200.000 euros), a través de medidas concretas que irá dando a coñecer nas vindeiras semanas.