A ruta circular comeza xunto ao miradoiro de Boqueiriño onde subiremos por unha pista en terra que fai a función de cortalumes, descubriremos vistas impresionantes ao canón, bosques de monte baixo, outros de sobreiras e madroños ou de carballos, mesturados con viñedos . A ruta recibe este nome porque atoparemos un exemplar de eucalipto de notables dimensións e que supera a idade de cen anos.

• Distancia: 4,45 km
• Duración: 1h 40m
• Señalización: Regular |
• Ruta circular: Si |
• Dificultade: Difícil.
• Coordenadas para iniciar a ruta: 42.402506,-7.5998128,836

Dende o Miradoiro de Boqueiriño a unha altura de 600 m sobre o Sil, veremos o magnífico Mosteiro de Santa Cristina ao outro lado do canón, en Ourense. Seguiremos a camiñata pola pista de terra medio quilómetro ata o chamado Colado do Santo. Dende esta pequeña chaira parte á dereita, o camiño do Eucalipto do Médico, que comeza cun lixeiro descenso que vai en aumento conforme camiñamos. Os primeiros  400 m son de monte baixo, pero logo veremos unha zona de sobreiras e madroños ata chegar a o lugar chamado O Santo, onde en tempos se cultivaron viñas pero que hoxe é unha carballeira.

Un pouco máis abaixo sae o camiño que leva ao lugar de Nogueira da Laxa, chea de viñedos, e tamén as viñas do Santo seguindo dirección a Souto Vello. Tamén atoparemos mananciais nunha zona adicada a pradarías.

Dende este punto a ruta pasa a ser un sendeiro cun descenso acusado ata que un cento de metros máis lonxe chegamos a ver o eucalipto máis lonxevo e de tamaño espetacular que iamos buscando. O eucalipto recibe ese nome por ter sido plantado por Don Gumersindo, un médico natural da aldea de O Pacio.

Podes descargar a ruta aquí:

https://es.wikiloc.com/rutas-senderismo/ruta-do-eucalipto-do-medico18227417