|
|
NOVAS |
MIGUEL FRANQUEIRO TOCARÁ COMO TUBA SOLISTA COA ORQUESTRA NACIONAL DE ESPAÑA
O director da Banda de Música de Sober, Miguel Franqueiro Becerra, tocará en Madrid coa ONE (Orquestra Nacional de España) a semana do 11 ao 16 de marzo dentro do ciclo de concertos de música e cine.
En concreto, interpretará diferentes bandas sonoras, como a de Tiburón, Drácula, Psicosis, Batman, Star Wars, Parque Jurásico, Código Da Vinci e Piratas del Caribe, entre outras.
A Orquestra Nacional de España ofrecerá tres concertos con este programa, os días 14, 15 e 16 de marzo nos que Franqueiro será o tuba solista.
Intensa actividade
O músico tocará a semana anterior coa Orquestra Sinfónica de Castela e León, despois de ter tocado no que vai de temporada coa coa Orquestra de Estremadura, coa Orquestra Sinfónica de Barcelona, coa Real Orquestra Sinfónica de Sevilla, coa Orquesta de RTVE e coa Orquestra do Gran Teatre del Liceu de Barcelona.
Miguel Franqueiro amosa a súa satisfacción por poder traballar “nas orquestras sinfónicas máis recoñecidas de España”, o que o consagra no panorama musical nacional. Tivo ademais unha invitación para colaborar cunha orquestra italiana de primeiro nivel, oferta que tivo que rexeitar polos seus compromisos xa pechados.
150 anos da Banda de Música de Sober
O director da Banda de Música de Sober traballa tamén xunto coa directiva e o Concello de Sober na programación que a formación e o Goberno local porán en marcha este ano con motivo do 150 aniversario do seu nacemento. “É un ano moi especial para a Banda de Música de Sober que contará cunha celebración acorde á súa historia na que prevemos a implicación non só dos músicos, senón de todo o Concello”, precisa.
|
|
|
|
|
|