NOVAS DO CONCELLO

NOVAS O CONCELLO DE SOBER INCORPORA FESTAS ACUÁTICAS NOCTURNAS Á SÚA OFERTA DE OCIO PARA O VERÁN O Goberno local do Concello de Sober incorpora novas actividades na súa ampla oferta de ocio para este verán. As instalacións das piscinas municipais acollerán festas acuáticas nocturnas para todos os públicos e festas con inchables para os nenos e nenas da Comarca.   Os días 27 de xullo e 9 de agosto celebraranse as primeiras festas acuáticas nocturnas do municipio que se iniciaran as 22:30 horas e se prolongarán ata as ben entradas as 2:30 horas da madrugada. Amais de permitirse o baño en horario nocturno estas festas contarán con animación musical e co servizo de bar que ofrecen as instalacións.   O alcalde do concello soberino, Luis Fernández Guitián, sinalou que a festividade pretende “que os veciños e veciñas desfruten da nosa piscina tamén nestas fermosas noites de verán”. Guitián precisou que “será totalmente gratuíta para todos os asistentes e contará coa presenza de dous socorristas”.   Os días 22 de xullo e 11 de agosto as instalacións das piscinas municipais acollerán as tradicionais festas con inchables que xa se celebraron en anos anteriores. Estas xornadas, destinadas aos máis pequenos, iniciaranse as 13:00 horas e finalizarán as 21:00 horas.   O alcalde apuntou que “estas iniciativas que puxemos en marcha son un incentivo máis para que os veciños e veciñas se acheguen a divertirse ás instalacións das nosas piscinas”.   Amplo programa de actividades   O rexedor salientou que “o Concello de Sober conta este ano cun amplo programa de ocio nas instalacións da piscina municipal”. E avanzou que “ademais destas actividades, contaremos con diversas sesións de contacontos os días 28 de xullo, 4 de agosto, 10 de agosto e 18 de agosto”.   Guitián recordou que “tamén temos dispoñible todos os días a bibliopiscina; os cursos de natación para nenos e adultos, os martes e xoves; o aquagym, os mércores e venres; e un obradoiro de pintura para os pequenos da familia todos mércores”.   O alcalde animou “a todos os veciños e veciñas do municipio soberino así como aos do resto da comarca a participar destas actividades coas que pasar un anaco agradable e desfrutar do verán”.