NOVAS DO CONCELLO

NOVAS O CONCELLO DE SOBER LEMBRA A MANUAL MARÍA NO PRIMEIRO PLENO ORDINARIO DO MANDATO O equipo de Goberno do Concello de Sober decidiu, a proposta do alcalde, Luis Fernández Guitián, lembrar e enxalzar a figura de Manuel María no primeiro Pleno ordinario da Corporación e agradecer á Real Academia Galega que vaia ser o poeta chairego a quen se lle dediquen ás Letras Galegas no ano 2016.   O rexedor subliñou “a importante relación que o escritor tivo ao longo da súa vida coa Comarca de Lemos”, polo que considerou “de xustiza” recuperar a súa figura e obra. Como recoñecemento á súa traxectoria o alcalde leu o seu poema ‘A fala’ e avanzou que o Concello de Sober aproveitará este ano para renderlle tributo “e que todos os nosos nenos e nenas e todos os veciños e veciñas coñezan o seu traballo por Galicia e polo noso idioma”.   Estrada de Sober a Gundivós En relación coa estrada que une Sober e Gundivós e ante as queixas expresadas por veciños e veciñas e polo grupo municipal Agroma Sober, o rexedor explicou que está en contacto cos técnicos da Deputación e co departamento de vías e obras “desde que comezaron a actuación”. Así mesmo, o rexedor ten o compromiso da Deputación provincial de que se farán traballos complementarios para solucionar os problemas que poidan existir na vía, nomeadamente nos puntos que presenten maior perigosidade.   Os técnicos xa visitaron as obras para, de xeito inmediato, consolidar melloras nos puntos máis conflitivos do trazado e habilitar biondas que melloren a seguridade da vía para os condutores.   Situación do sector lácteo O rexedor de Sober deu conta ademais da preocupación do Concello pola situación que vive o sector lácteo en Galicia. Por iso, explicou que está a participar na plataforma de alcaldes que buscan unha solución para o problema que viven os produtores galegos. Aínda que o municipio non é dos que máis explotacións ten da Comarca, Fernández Guitián, considera preciso “estar do lado dos gandeiros” para artellar mecanismos que permitan que os custos de produción sexan os axeitados. O rexedor avanzou que ten colaborado coa plataforma de alcaldes na manifestación que se celebrou en Santiago o pasado mes, como así fará na que se ten convocado en Chantada o próximo día 6 de agosto.   Incendios forestais A Corporación soberina acordou por unanimidade celebrar unha xunta de voceiros para trazar solucións a nivel local que axuden a paliar a lacra que supoñen os incendios forestais. As medidas que se buscan irán encamiñadas a facer cumprir as ordenanzas municipais e a Lei de Incendios, polo que se contará coas comunidades de montes e asociacións de veciños para conciencialas da importancia da limpeza dos montes e da biomasa.