|
|
NOVAS |
O ALCALDE DE SOBER VISITA A REMODELACIÓN DO PAVILLÓN DO COLEXIO CO SECRETARIO XERAL PARA O DEPORTE
O alcalde de Sober, Luis Fernández Guitián, visitou esta mañá o pavillón do CEIP Virxe do Carme co secretario xeral para o Deporte, José Ramón Lete Lasa, para coñecer o resultado da reforma da cuberta.
En concreto, ambos os mandatarios revisaron a recente remodelación do pavillón, posible grazas a unha axuda da Secretaría Xeral para o Deporte e outra da Consellería de Educación por un importe total de 75.000 euros. Ambas as axudas permitiron facer obras para instalar a nova cuberta do pavillón, así como construír o peche perimetral e o acceso a través do exterior.
O alcalde destaca que “agora as instalacións se atopan en moito mellores condicións” para o desfrute non só dos nenos e nenas do CEIP Virxe do Carme, senón para todos os deportistas que as usan e para outras actividades que acollen as pistas como a festa da terceira idade ou eventos deportivos varios.
“Era unha necesidade urxente, polo que agradecemos o compromiso da Xunta de Galicia con esta actuación”, remarcou Fernández Guitián. O rexedor avanzou ademais que o Goberno local buscará financiamento para poder acometer unha nova actuación que permita revestir as parades e facer un novo graderío no pavillón.
Mellora da cuberta
A mellora desta instalación consistiu no acondicionamento da cuberta, unha actuación que se facía necesaria para dotar o pavillón das condicións axeitadas para a práctica deportiva tanto dos escolares do centro como dos veciños e visitantes en xeral. A reforma supuxo un investimento de 38.000 euros e foi posible grazas ao convenio asinado en xuño entre a Secretaría Xeral para o Deporte, que achegou 31.000 euros, e o Concello, que destinou 7.000 euros.
Lete Lasa manifestou a súa satisfacción por ter cumprido co compromiso que adquiriu na súa visita á localidade o pasado mes de marzo, lembrando que é obriga da Administración autonómica poñer todos os medios posibles ao seu alcance para mellorar as infraestruturas e os equipamentos deportivos da Comunidade autónoma, como ferramenta ao servizo do deporte galego e do fomento do exercicio físico en todos os sectores de poboación, ao longo do territorio do país.
Neste sentido, considerou que este tipo de actuacións forman parte da vontade e do deber da Xunta de Galicia de favorecer o equilibrio territorial, a calidade de vida e a igualdade de oportunidades de todos os galegos e galegas, tanto nos núcleos urbanos como rurais, costeiros ou de interior, e animou aos responsables do Concello de Sober a seguir impulsando a práctica deportiva especialmente desde o punto de vista da saúde e do benestar dos veciños, así como do potencial económico que o binomio deporte e turismo de natureza ofrece en localidades tan atractivas para tal fin como as pertencentes á Ribeira Sacra.
|
|
|
|
|
|