NOVAS DO CONCELLO

NOVAS VECIÑOS E TURISTAS DENUNCIAN O DEPLORABLE ESTADO NO QUE SE ATOPAN AS ESTRADAS DA DEPUTACIÓN AO SEU PASO POLO CONCELLO DE SOBER O alcalde de Sober, Luis Fernández Guitián, denuncia o deplorable estado no que se atopan as estradas de titularidade da Deputación ao seu paso polo Concello. O rexedor afirma que se trata da principal queixa dos centenares de turistas que este verán se achegaron a coñecer a localidade e a Ribeira Sacra no seu conxunto.   Desde o Goberno local critican ademais que a mediados de agosto a institución provincial aínda non teña iniciado o desbroce das estradas, a pesar da insistencia do alcalde ante o Servizo de Vías e Obras.   “Non parece lóxico que un Concello declarado recentemente de Interese Turístico presente unhas estradas cunha imaxe como a actual”, precisa o mandatario, quen engade que á práctica totalidade dos recursos turístico de Sober, tales como os miradoiros do Canón do Sil, a olería de Gundivós, o románico rural ou ás adegas, se accede a través de estradas de titularidade provincial que presentan unha imaxe lamentable. En concreto, Fernández Guitián, sinala que as reclamacións se refiren principalmente  á estrada de Sober a Gundivós e á de Sober a Doade, aínda que tamén precisan unha reparación urxente a de Canabal a Anllo por Rosende ou a de As Gándaras a Chanteiro.    Tanto os veciños como os visitantes e o Goberno local advirten dunhas estradas de titularidade provincial nun estado deplorable, cheas de maleza, coa capa de rodadura absolutamente levantada en moitos tramos e con infinidade de socavóns de considerable tamaño.   Petición de entrevista O alcalde explica que ten trasladado as queixas en infinidade de ocasións sen que sexan atendidas polo organismo provincial.  Dende o Concello de Sober téñense presentado unha vez máis as queixas ante o presidente da Deputación ao que incluso o rexedor lle solicitou unha entrevista persoal e convídao a que faga unha visita in situ na que el mesmo poida comprobar a desfeita que se observa nas estradas provinciais.   Luis Fernández Guitián considera que “Sober vai ser un piar fundamental para a consecución da Ribeira Sacra como Patrimonio da Humanidade, se ben as infraestruturas de acceso dependentes da Deputación de Lugo non van axudar en absoluto a conseguir este obxectivo”. “Co verán chegando ao seu fin a imaxe que se deu este ano xa non ten volta atrás e o desbroce xa non estará rematado antes de setembro o que, sen dúbida, é un absoluto despropósito”, conclúe.