|
|
NOVAS |
O CONCELLO DE SOBER EDITA UNHA GUÍA CON INFORMACIÓN DE TODAS AS ADEGAS DA DENOMINACIÓN DE ORIXE DA LOCALIDADE
O Concello de Sober acaba de editar 4.000 exemplares dunha guía con información de interese das 35 adegas instaladas en Amandi e na ribeira do Cabe pertencentes á Denominación de Orixe Ribeira Sacra. O alcalde de Sober, Luis Fernández Guitián, explica que a finalidade é a de promocionar as adegas da localidade en eventos turísticos, así como ter un material de interese para os turistas que se repartirá nas oficinas municipais.
En cada unha das fichas que se axuntan na guía sobre cada adega figura o logo identificativo, o nome, a situación xeográfica, o teléfono e os datos das diferentes páxinas web, así como a persoa de contacto de cada unha delas. Trátase, segundo subliña o alcalde, “dun escaparate a través do cal coñecer todos os caldos que se producen en Sober”.
Tamén se engade unha lenda na que se precisa que “os viños Amandi se colleitan no sureste do Concello de Sober, na ribeira do Sil”. “A súa orientación, vencellada ao microclima mediterráneo desa zona e o cultivo en bancais, así como a utilización de variedades autóctonas de alta calidade fixérono merecedor de numerosos premios e recoñecementos a nivel internacional, ademais de aparecer recomendado nos mellores restaurantes e guías gastronómicas”, engade a guía.
A guía vaise incorporar tamén ao apartado adegas que figura na web www.concellosdesober.com.
Para ver o díptico preme aquí:
Páxina1
Páxina2
|
|
|
|
|
|