|
|
NOVAS |
O MÚSICO MIGUEL FRANQUEIRO REFORZARÁ A PLANTILLA DA ORQUESTRA DO TEATRO ALLA SCALA DE MILÁN
O músico Miguel Franqueiro Becerra (Boqueixón, 1983) reforzará a plantilla da Orquestra do Teatro Alla Scala de Milán despois de gañar unha audición de tuba na formación de ópera máis importante do mundo.
O director da Banda de Música de Sober fixo unha proba a telón (sen contacto visual co xurado) fronte a aspirantes inscritos de diferentes nacionalidades na que se alzou como o gañador. Na audición tivo que interpretar a Blazevich, Wagner, Léo Delibes e Verdi, entre outros compositores.
Entre máis de 40 inscritos tan só tres músicos pasaron á final na que tiveron que tocar, ademais da tuba, o cimbasso, un instrumento tradicional italiano que empregan para interpretar obras de Verdi. A proba incluía este instrumento que o músico terá que manexar nos seus debuts coa orquestra. Trátase, tal e como explica Franqueiro, dunha proba “que esixía unha gran preparación e moita concentración”.
A partir de agora o tubista terá que facer programas coa Scala con frecuencia, posto que a orquestra ofrece funcións diarias para as que necesitan músicos de reforzo.
Ademais de dirixir a Banda de Música de Sober, Miguel Franqueiro Becerra é o tuba de reforzo na Real Filharmonía de Galicia. Colabora tamén con outras orquestras nacionais e internacionais, como a Sinfónica de Galicia, a Orquestra Nacional de España, a Orquestra de RTVE, a Orquestra do Liceo de Barcelona ou a Filarmonica Teatro Regio de Torino.
Desde o Concello de Sober trasládanlle os parabéns ao músico por este novo éxito na súa carreira nun ano moi importante para a formación local, que en 2019 celebra o seu 150 cumpreanos.
|
|
|
|
|
|