NOVAS DO CONCELLO

NOVAS O CONCELLO DE SOBER ENVIARÁ O DEBUXO GAÑADOR DO CERTAME INFANTIL DA XXXIX FEIRA DO VIÑO DE AMANDI COMO TARXETA POSTAL AOS CENTROS GALEGOS DE EUROPA E AMÉRICA O alcalde de Sober, Luis Fernández Guitián, deu a coñecer hoxe o debuxo gañador do concurso para escolares da Comarca convocado polo Concello con motivo da XXXIX Feira do Viño de Amandi. O Goberno local a través dun acordo con Correos converteu o debuxo nunha tarxeta postal prefranqueada que enviará aos Centros Galegos de Europa e América co obxectivo de conseguir unha difusión internacional.   Trátase, como explicou o rexedor,  de que tanto a XXXIX Feira do Viño de Amandi, como a localidade de Sober e toda a Ribeira Sacra teña presenza en todos aqueles países nos que exista un Centro Galego, tanto en Europa como en América.   Ademais do debuxo gañador a postal incorpora o logo do Concello de Sober, o cartel gañador do concurso que promociona a XXXIX Feira do Viño de Amandi e o slogan do Consorcio de Turismo de Ribeira Sacra.   Ademais deste envío, o Goberno local agasallou coas postais a todos os nenos e nenas que participaron no certame de debuxo. Fixo entrega ademais dun lote á gañadora e ao centro gañador, o CEIP Plurilingüe Virxe do Carme de Sober. A gañadora recibe tamén un premio valorado en 150 euros e concédese un accésit de 50 euros ao mellor debuxo de cada colexio participante: Patricia López, do Saviñao, Celia María García, do Monte Baliño de Pantón e Xoán Pérez, de Sober.   As restantes tarxetas postais impresas por Correos estarán á disposición do público na Oficina de Turismo de Sober a un prezo de 1,5 euros.   Deseño de Uxía Trail Bates No concurso participaron os centros escolares de Currelos, Pantón e Sober, con 100 orixinais. O debuxo gañador foi o de Uxía Trail Bates, do CEIP Plurilingüe Virxe do Carme de Sober. Os traballos de todos os participantes están expostos na Casa da Cultura de Sober.   Xurado Os encargados de elixir o traballo gañador foron Rodrigo Coucheiro, gañador do certame de carteis da XXXIX Feira do Viño de Amandi e Eva Abal, empresaria e emprendedora da localidade especializada en deseño e interiorismo.   Que é unha tarxeta postal? Son postais convencionais cunha imaxe, neste caso o debuxo gañador do concurso infantil da XXXIX Feira do Viño de Amandi. Levan o selo impreso, non adherido. Poden depositarse en calquera caixa de Correos xa que levan o franqueo incorporado.