NOVAS DO CONCELLO

NOVAS O CONCELLO DE SOBER ADHÍRESE Á INICIATIVA EUROPEA DO PACTO DOS ALCALDES POLO CLIMA E A ENERXÍA O Concello de Sober aprobou no Pleno do pasado día un de abril a adhesión á iniciativa europea do Pacto dos Alcaldes polo Clima e a Enerxía.   O rexedor, Luis Fernández Guitián, explica que se trata dunha iniciativa “moi necesaria” para conseguir a sustentabilidade enerxética e a adaptación ao cambio climático do noso Concello.   A Corporación acordou entre outros compromisos: reducir as emisión de CO2, traballar na promoción de medidas de adaptación ao cambio climático, elaborar un inventario de emisións de referencia e unha avaliación de riscos e vulnerabilidades derivados do cambio climático, facer un plan de acción para o clima e a enerxía  sustentable no prazo de 2 anos, elaborar un informe bianual para a avaliación e control dos obxectivos, así como compartir a visión, os resultados, experiencia e coñecemento con outros concellos de Europa. Tamén se acorda adaptar as estruturas do Concello ou mobilizar a sociedade civil do noso ámbito para que participe no Plan de Acción.   O Pleno aprobou ademais o Prego de Cláusulas Administrativas e de Prescricións técnicas para a adxudicación do contrato de recollida e transporte de residuos urbanos.   O rexedor deu conta tamén da suba dun 2,25% das retribucións a todo o persoal do Concello con data de un de xaneiro.   Outros acordos Por iniciativa de Agroma Sober aprobouse una moción sobre o apoio á Oleiría tradicional de Gundivós e unha do PSOE sobre a adopción dun modelo asistencial de proximidade e de axuda no fogar.