|
|
NOVAS |
O CONCELLO DE SOBER INICIA AS OBRAS DE ACONDICIONAMENTO DE CAMIÑOS RURAIS
O Goberno local do Concello de Sober informa da posta en marcha das obras de acondicionamento de camiños correspondentes ao Plan Marco de Camiños Rurais das anualidades 2017-2018. As obras contan cun orzamento de 87.000 euros por cada anualidade, dos cales a Consellería de Medio Rural achega 70.000 e o Concello a contía restante.
Con cargo a este proxecto faranse obras de accesos a Sistín do Mato desde Canaval; os accesos a Casar de Cima dende o Cruceiro de Lobios; o remate dos accesos a Mourentán desde O Cadaval -en Doade- e os accesos a O Taro e Suairexa de Figueiroá dende Santa Marta.
Desde o Concello avanzan que nos próximos días sairá a licitación o Plan Marco de 2018, que achegará a Sober un importe de 87.000 euros, que se van destinar aos accesos a Francos e Sansillao en Proendos; a estrada dende Villoriz e O Taro de Bolmente ata Camilo e Arxemil; a estrada dende Naz por Fondo de Vila a Lama dos Campos en Rosende e os accesos dende Outeiro (Proendos) á estrada Sober-Doade.
Está previsto tamén executar a mellora con aglomerado da estrada que une Vilanova en Gundivós con Neiras, cuxo orzamento ascende a 60.000 euros. A obra será financiada pola Consellería do Medio Rural.
50.000 euros de fondos municipais
Pola súa parte o Concello de Sober ten previsto executar con fondos propios actuacións por máis de 50.000 euros que inclúen, entre outras, as melloras dos accesos en A Pena de Gundivós, a estrada de Cantón a Igrexa de Amandi, os accesos A Lampaza en Doade, Camporrairo en Canaval, Sanmil en Brosmos, A Boca en San Martiño de Anllo e o camiño de Moreda a Pena de Miro en Vilaescura. Tamén se farán os accesos a Hortás, en Anllo Santo Estevo; Sanxis en Brosmos; e As Moreiras en Amandi.
Mellora de rúas na capitalidade
Ao mesmo tempo saíron a licitación as obras para o arranxo de dúas rúas de circunvalación da capitalidade municipal que, segundo apunta o alcalde, Luis Fernández Guitián, se consideran moi necesarias pola súa función de circunvalación. Trátase da Travesía de Belán, que comunica a estrada de Sober a Canaval coa estrada de Sober a Lama dos Campos; e a Rúa do Colexio, que comunica a estrada de Gundivós coa Rúa da Mina. En ambos os casos, as rúas serán melloradas con aglomerado e procederase á sinalización vertical e horizontal. Estas obras contan cun orzamento de 75.000 euros e son financiadas pola Axencia Galega de Infraestruturas da Xunta de Galicia.
|
|
|
|
|
|