|
|
NOVAS |
SOBER INAUGURA MAÑÁ A RUTA DE SENDEIRISMO DO ‘EUCALIPTO DO MÉDICO’
Sober contará a partir de mañá cunha nova ruta de sendeirismo, a coñecida como ruta Eucalipto do Médico. O traxecto foi recuperado a través da Comunidade do Monte Veciñal en Man Común Camilo Bolmente cunha axuda aos investimentos non produtivos vinculados á realización de obxectivos agroambientais e climáticos dentro de Red Natura. A obra foi realizada pola empresa de Lugo Nuevos Jardínes.
A inauguración oficial será este sábado 27 ás 10:30 horas e nela participará o alcalde da localidade, Luis Fernández Guitián. Farase a saída desde o aparcadoiro do Miradoiro O Boqueiriño e o rematar a ruta farase unha festa no Centro Social de Bolmente.
O rexedor subliña o traballo que se fixo desde a Comunidade de Montes, promotores da recuperación desta ruta que ten 2.990 metros e discorre desde o aparcadoiro do Boqueiriño subindo pola pista que vai ao miradoiro e continuando polo cortalumes ata o Colado do Santo. De aí báixase ao Eucalipto do Médico, unha árbore centenaria de grandes dimensións, e á volta remata no petroglifo a Laxa da Carreira.
Ten unha duración de dúas horas e unha dificultade media.
|
|
|
|
|
|