NOVAS DO CONCELLO

NOVAS O CONCELLO DE SOBER RENOVA CON TECNOLOXÍA LED O ALUMEADO DE 12 POBOS DA PARROQUIA DE GUNDIVÓS O Goberno local do Concello de Sober vén de rematar as actuacións de renovación do alumeado en 12 pobos da parroquia de Gundivós. A obra, que consistiu na instalación de luminarias Led de última xeración con moi baixa contaminación lumínica e moi boa luminosidade, foi financiada con cargo a unha axuda de 35.000 euros do Plan de Aforro Enerxético da Deputación Provincial de Lugo.   O alcalde de Sober, Luis Fernández Guitián, sinalou que “os lugares nos que se acometeron obras con este Plan nas últimas semanas foron: Recimil, Santa Mariña, Gundivós O Vello, Vilanova, Santadriao, Sas, A Sobreira, A Airexa, Seoane, Penelas, A Pena de Gundivós e A Lama de Liñarán. Todos eles pertencentes á parroquia soberina de Gundivós”.   Guitián puxo de manifesto a importancia destas actuacións e precisou que “con estes traballos renováronse en torno a 90 luminarias”. O rexedor engadiu que “todas as obras de mellora de alumeados públicos que acomete o Concello traen consigo, ademais da renovación das vellas luminarias por unhas de última xeración de baixo consumo, a retirada de moitos postes duplicados coa correspondente mellora estética da zona”.   O alcalde salientou que “estas actuacións implican un importante aforro  diario no consumo de enerxía eléctrica, debido á unificación dos cadros e á eficiencia enerxética dos novos equipos”.    En 4 anos renováronse o 85% das luminarias do Concello Fernández Guitián destacou tamén que nos últimos 4 anos o Goberno local renovou en torno ao 85 por cento dos puntos de luz do Concello con tecnoloxía Led ou aloxenuro metálico.   O rexedor recordou que, sen ir máis lonxe, “o ano pasado o Concello mellorou a iluminación de 9 pobos da parroquia de Pinol, o núcleo de Doade, Fontemaior (Lobios), Mer e Froxán en Proendos ou Sistín do Mato e Camporrairo en Canabal”.   Guitián avanzou ademais que “para este 2017 temos previsto continuar con traballos similares en outros lugares do Concello”.