|
|
NOVAS |
A CANTANTE E VIOLONCHELISTA ROSA CEDRÓN SERÁ A PREGOEIRA DA XXXVII FEIRA DO VIÑO DE AMANDI
O Goberno local do Concello de Sober vén de facer público o nome da persoa que se encargará de pronunciar o pregón inaugural da XXXVII Feira do Viño de Amandi, que este ano se celebrará os días 8 e 9 de abril. Así, a cantante e intérprete de violonchelo Rosa Cedrón será a pregoeira deste ano, sucedendo no posto á presentadora Silvia Jato.
O alcalde, Luis Fernández Guitián, agradece “a implicación e boa disposición por colaborar coa nosa Feira desta recoñecida violonchelista de orixe monfortina, que está moi vinculada ás costumes da nosa comarca por ter nacido aquí”.
O rexedor considera a Cedrón como “unha das embaixadoras musicais da Ribeira Sacra” por ser unha persoa que foi levando a súa arte e as súas raíces por toda España e internacionalmente en cidades tan importantes como Nova York, Toulouse ou Bos Aires.
Guitián amosouse moi orgulloso de que unha persoa tan coñecida e recoñecida como Cedrón, “que foi a voz durante 9 anos dun grupo tan relevante como Luar na Lubre e colaborou con Mike Olfield, un dos mellores músicos de todos os tempos”, sexa a pregoeira da XXXVII edición da Feira do Viño de Amandi.
O alcalde resaltou ademais a gran calidade como persoa e como artista de Cedrón “que se converteu por méritos propios nunha nova artista para ter en conta no eido do folk e da world music a nivel mundial”.
Amais do pregón do domingo, Rosa Cedrón ofrecerá o sábado na Praza do Concello o concerto ‘estrela’ da XXXVII Feira do Viño de Amandi ás 22:30 horas.
|
|
|
|
|
|