SOBER INSTALA UN PUNTO PÚBLICO DE RECARGA DE DISPOSITIVOS MÓBILES
O Goberno local de Sober vén de instalar no Concello un punto público de recarga, totalmente gratuito, para todo tipo de dispositivos electrónicos. Así o anunciou o alcalde, Luis Fernández Guitián, quen precisou que o punto de alimentación permite aos usuarios cargar a batería de teléfonos móbiles, tablets ou calquera outro dispositivo.
O rexedor sinalou que “o servizo está emprazado no xardín da praza do Concello do municipio” e recordou que “nesa mesma praza xa contamos dende fai tempo con Wifi gratuito para todos os usuarios e usuarias”. Guitián avanzou tamén que o punto de recarga conta con dous enchufes para todo tipo de aparatos de telefonía móbil e poderá utilizarse as 24 horas do día.
Deste xeito Sober convértese nun dos poucos concellos galegos que contan con este tipo de servizo. O alcalde soberino salientou que “dende o Concello estamos sempre á vangarda e con esta nova incorporación queremos facilitar o uso das novas tecnoloxías a toda a veciñanza e tamén aos que nos visitan”.
|