|
|
NOVAS |
O ‘FALADOIRO DOS LUNS’ DE SOBER INICIA UNHA NOVA TEMPADA O PRÓXIMO DÍA 26
O Faladoiro dos Luns de Sober inicia a súa actividade o vindeiro luns 26, despois das vacacións da época estival. Esta iniciativa, que naceu hai dous anos, chega cargada de actividades para dar comezo a un novo período. A mestra Teresa Grau será a encargada de inaugurar esta tempada cunha clase baseada en exercicios sinxelos nos que ensinará aos asistentes a manter viva a súa vitalidade. Impartirase, como sempre, ás 16:30 horas no Centro Sociocultural do municipio soberino.
O Faladoiro dos Luns naceu no ano 2014 na Biblioteca municipal a raíz da proposta dun grupo de persoas adultas dispostas a contar e compartir experiencias propias e sabedoría como un modo de preservar as tradicións. Conformouse como unha actividade sociocultural aberta a todos e todas aqueles que teñan unha habilidade persoal e estean dispostos a compartila para que non se perda.
O alcalde do Concello de Sober, Luis Fernández Guitián anima a todos os veciños e veciñas da localidade “a que participen nesta iniciativa e compartan as súas destrezas: tales como a calceta, receitas, trucos de reciclaxe, adornos de Nadal, etcétera, nas tardes dos luns”.
O Club de Lectura Pintor de Castinade retoma a súa actividade
O Club de Lectura Pintor de Castinande, que xa cumpre nove anos, inicia este mércores unha nova tempada. O colectivo organiza reunións todos os mércores, a partir das sete da tarde, nas que se comentan libros e compártense impresións e recomendacións entre afeccionados á lectura. As actividades desenvólvense na Biblioteca municipal de Sober. Os interesados en formar parte deste colectivo poden informarse na Biblioteca soberina.
|
|
|
|
|
|