|
|
NOVAS |
ABERTO O PRAZO DE MATRÍCULA NA ESCOLA MUNICIPAL DE MÚSICA DE SOBER
A Escola Municipal de Música de Sober acaba de abrir o prazo de matrícula para o vindeiro curso 2016/2017. Os interesados e interesadas poderán anotarse ata o vindeiro día 26 de setembro no Centro Sociocultural da localidade, sede da Escola Municipal de Música. Para máis información tamén poden chamar aos números de teléfono 982460513 ou 617551299.
Os alumnos e alumnas que se inscriban poderán aprender e familiarizarse con instrumentos de diversas especialidades da familia de vento-madeira como a frauta traveseira, o clarinete ou o saxofón; de vento metal como o trombón, a trompa ou a tuba e de percusión como a batería, a caixa, o bombo ou os platillos, entre outros. Tamén se impartirán clases de piano ou guitarra.
Ademais de este amplo abano de especialidades instrumentais os alumnos e alumnas completarán a súa formación con clases de linguaxe musical e poderán pasar a formar parte da banda xuvenil ou do coro do municipio soberino.
A presentación do curso e recollida de horarios levarase a cabo o sábado 1 de outubro ás 12:00 horas no Centro Sociocultural da localidade.
O alcalde do Concello soberino, Luis Fernández Guitián, animou a todos os veciños e veciñas da localidade “tanto nenos como adultos” a formar parte da escola de música “que ano tras ano vai medrando, ampliando a súa oferta e consolidándose como un referente na nosa Comarca”.
Xoves de Cantos
O rexedor recordou tamén que dentro da ampla oferta da Escola de Música de Sober seguiranse celebrando os Xoves de Cantos. Guitián sinalou que se trata “dun grupo de canto para adultos que se xunta todos os xoves ás 18:30 horas no noso Centro Sociocultural e do que xa forman parte unha vintena de persoas que constituíron o primeiro coro do municipio denominado Coro Berea”.
O alcalde avanzou que os interesados e interesadas en obter máis información e anotarse poden chamar aos números de teléfono 982460513 ou 617551299.
|
|
|
|
|
|