NOVAS DO CONCELLO

NOVAS O CONCELLO DE SOBER SACA ADIANTE UN PRESUPOSTO DE MÁIS DE 2,3 MILLÓNS DE EUROS NO QUE PRIMA O GASTO SOCIAL E AS INVERSIÓNS O Goberno local do Concello de Sober sacou adiante na última sesión plenaria -celebrada o mércores- os presupostos do Concello, que supoñen un montante total de 2.350.000 euros. O rexedor do municipio, Luís Fernández Guitián, salientou o incremento da partida orzamentaria respecto á do ano anterior cuns “400.000 euros máis que a pasada anualidade na que se prima o gasto social e as inversións”.   O popular apuntou que “contamos cunha importante partida social, algo máis de 500.000 euros, na que se inclúen as axudas no fogar; un capítulo para emerxencia social e mantéñense as becas de transporte universitario”. Así mesmo, o popular quixo salientar que se reserva, por vez primeira, unha partida para a Escola Municipal de Teatro, así como un capítulo para colaboracións coas organizacións musicais do Concello e a compra dun piano de cola para o Auditorio da Casa da Cultura.   Con cargo ao capítulo do gasto social haberá tamén obras de mantemento para a gardería, a Casa da Cultura e o ximnasio. “Son uns orzamentos importantes onde priman principalmente as persoas, con 14 auxiliares de axuda a domicilio para o ano 2016”, engadiu o alcalde.   800.000 euros para inversións O rexedor soberino destacou que a partida máis importante do presuposto son as inversións, con máis de 800.000 euros destinados “a actuacións en todas as parroquias, primando o rural”. Guitián apuntou que este capítulo conta “con axudas duns convenios extraordinarios firmados coa Deputación de Lugo e tamén con axudas directas da Xunta de Galicia”. O popular puntualizou que entre as actuacións contempladas “temos o mantemento de camiños, cunha partida de 117.000 euros do Plan de Camiños Rurais subvencionado pola Xunta con 98.000 e 19.000 euros que achega o Concello.     O POS, para obras de saneamento “A intención, explica o rexedor, é que o POS deste ano se destine a obras de saneamento. Temos 75.000 euros, máis 70.000 euros dun convenio coa propia Deputación; acometeremos tamén diversas actuacións como a sinalización de núcleos que estamos a facer xa; a reparación de unidades no Centro Sociocultural ou a creación dun aula de novas tecnoloxías, tamén isto con cargo a unha partida subvencionada nun 95% pola Deputación”.   “Haberá tamén unha partida moi importante de mellora de accesos a viñedos, cerca de 50.000 euros e tamén contemplamos a creación e dotación dun albergue municipal cunha partida de 20.000 euros”. Guitián engadiu que se destinarán 40.000 euros para a creación de áreas biosaudables e infantís en diversos puntos do municipio e tamén quixo destacar “a intención de adquirir o anterior edificio da Cámara Agraria para que pase a ser de titularidade municipal. Temos tamén a previsión de comprar terreos para facer un área de auto caravanas e a posta en valor do Castro de Sober que está na propia capital municipal”, concluíu.