NOVAS DO CONCELLO

NOVAS O CONCELLO DE SOBER DEDÍCALLE O MES DAS LETRAS A MANUEL MARÍA   O Goberno local do Concello de Sober dedícalle o Mes das Letras, maio, a Manuel María, escritor vinculado á Ribeira Sacra durante unha longa etapa da súa vida. Así, as actividades organizadas pola Biblioteca Pública Municipal no marco das ‘Merendas con Contos’ dos venres serán unha homenaxe ao chairego.   A programación dará comezo o venres día 6 de maio co contacontos O poeta do Miño a cargo de Polo Correo do Vento, unha actividade que forma parte do programa Ler Conta Moito, promovido pola Xunta de Galicia.   O mesmo día inaugurase na Casa da Cultura a Exposición de Martínez Coello ‘48 momentos’, Alejandro Ciurluini e Cándido Caneiro. A mostra estará aberta ao público do 6 de maio ao 30 de xuño.   O día 13 de maio será a data de celebración das Letras Galegas cun concerto da Escola Municipal de Música de Sober no que haberá música en movemento, unha actuación do coro infantil, do Coro Berea e da Banda Xuvenil. Con este concerto afondarase tamén na figura e na obra de Manuel María.   O día 20 de maio os nenos e nenas que participan nas Merendas con Contos asistirán a unha sesión de cine. E o venres 27 de maio farase a entrega de premios do Certame das Letras Galegas de narración e debuxo infantil. A tarde acabará cunha merenda para todos os participantes.   Todas as actividades se celebrarán na Biblioteca Pública Municipal os venres ás 17:30 horas, agás a sesión de cine.