NOVAS DO CONCELLO

NOVAS O CONCELLO DE SOBER RECIBE 30 CARTEIS PARA O CONCURSO DA XXXVI FEIRA DO VIÑO DE AMANDI O Concello de Sober agradece a alta participación no concurso do que sairá o cartel que anuncie a XXXVI Feira do Viño de Amandi. Este ano o Goberno local recibiu 30 carteis dentro de prazo, un número similar aos que participaron no certame o pasado ano. O traballo gañador coñecerase o día 20 de febreiro na contorna dos Muíños do Xabrega, cando se presenten todos os actos que formarán parte da feira na edición deste ano, que terá lugar o 19 e 20 de marzo.   O rexedor, Luis Fernández Guitián, subliña que o concurso “ten xa carácter nacional”, posto que se recibiron carteis de diferentes puntos da xeografía española. En concreto, chegaron exemplares de Valencia, do País Vasco, de Cataluña ou Castela-León, así como da Ribeira Sacra e doutras zonas de Galicia.   O gañador farase cun premio en metálico de 600 euros. Os deseños debían reflectir, tal e como recollían as bases, o espírito da Feira do Viño de Amandi facendo especial fincapé no sector vitivinícola e no patrimonio e cultura da localidade. O deseño gañador será empregado como cartel anunciador da XXXVI Feira do Viño de Amandi, así como nos programas de man.   O equipo de Goberno fará unha exposición con todos os traballos presentados ao concurso. Inaugurarase o 19 de marzo, coincidindo coa apertura da XXXVI Feira do viño de Amandi, e permanecerá aberta ata o 20 de abril.   O día 20 de febreiro o Concello de Sober dará a coñecer tamén as actividades que se enmarcan no Mes do Amandi.