NOVAS DO CONCELLO

NOVAS O CONCELLO DE SOBER CONVOCA UN CONCURSO PARA ELIXIR O CARTEL ANUNCIADOR DA XXXVI FEIRA DO VIÑO DE AMANDI A XXXVI Feira do viño de Amandi celebrarase os días 19 e 20 de Marzo de 2016 coincidindo como dende a súa primeira edición coa fin de semana do domingo de Ramos. O Goberno local do Concello de Sober preparará un ano máis diversas actividades enmarcadas no denominado ‘Mes do Amandi’ que se iniciarán coa presentación do cartel anunciador e o programa de actos, evento que terá lugar o día 20 de febreiro nun lugar turístico destacado do Concello de Sober.   Así, o Goberno local convoca un concurso de deseño gráfico co fin de elixir o cartel anunciador da XXXVI Feira do Viño de Amandi.. Os interesados en formar parte poderán presentar os seus traballos desde o luns e ata o último día de xaneiro. O gañador farase cun premio en metálico de 600 euros.   O Goberno local vén de facer publicas as bases que rexen o concurso e que xa se poden consultar na web municipal www.concellodesober.com.   Os traballos deben presentarse en formato A3 e a técnica é libre. Deberán ser presentados en soporte ríxido para facilitar a súa exposición e só se pode presentar un cartel por autor ou autora.   As bases recollen ademais que os deseños deben reflectir o espírito da Feira do Viño de Amandi facendo especial fincapé no sector vitivinícola e no patrimonio e cultura da localidade. O deseño gañador será empregado como cartel anunciador da XXXVI Feira do Viño de Amandi, así como nos programas de man. Os restantes carteis presentados poderán ser expostos se o Concello así o considera.   Todos os traballos poderán ser entregados no Concello de Sober desde o luns e ata o 31 de xaneiro en horario de 10:00 a 14:00 horas.   Reunión cos adegueiros O Goberno local convocará antes do 15 de xaneiro a primeira reunión cos adegueiros para abordar os preparativos e detalles da XXXVI Feira do Viño. Tamén se fixará a data para participar na feira e darase conta das primeiras novidades para a edición deste ano.