|
|
NOVAS |
O CONCELLO DE SOBER BAIXA A TAXA DO IBI EN MÁIS DUN 25%
O Goberno local do Concello de Sober aprobou onte en sesión ordinaria de Pleno unha baixada do tipo impositivo do IBI de cara 2016 que quedará no 0,52% para inmobles urbanos e do 0,48% para rústicos. Este descenso supón, tal e como explicou o rexedor, unha baixada de máis dun 25% de redución na contribución con respecto ao 2015. Ata o de agora os tipos de gravame atopábanse no 0,66% en urbana e 0,55% en rústica.
O equipo de Goberno fixo esta proposta tendo en conta a recente regularización catastral que trae consigo a alta de numerosas construcións ata agora non dadas de alta e tamén importantes reformas ou ampliacións, noutros casos. Con esta importante baixada os veciños e veciñas de Sober non sufrirán subas significativas no recibo da contribución e, en moitos casos, haberá baixadas de preto dun 30 por cento.
A ordenanza recolle diversas exencións ou cotas reducidas, entre outras un 90%. O equipo de goberno está aberto ademais a novas baixadas de acordo cos ingresos que o IBI xere a partir de 2016. Por outro lado, tamén se poderá compensar o IBI a persoas ou familias con dificultades económicas e previo informe dos servizos Sociais do Concello.
Outros acordos
No pleno de onte, amais do sorteo dos membros das 8 mesas electorais, aprobouse unha moción contra a violencia de xénero por unanimidade.
Deuse luz verde á adaptación da nova Lei de Vivenda a ordenanza da Área de Rehabilitación Integral de Sober. Igualmente se adaptou a ordenanza municipal de terrazas ás recomendacións do Consorcio de Turismo en canto a estética e lugares turísticos.
Por último, nomeouse a Comisión municipal para o deslinde con Monforte que está citada polo Instituto Xeográfico e a Dirección Xeral de Administración Local para o 3 de decembro no Salón de actos do Concello de Sober. A esa reunión asistirá a comisión que forme o Concello de Monforte e técnicos do Instituto Xeográfico Nacional e da Dirección Xeral de Administración Local.
No caso de Sober a comisión está formada polo alcalde, os portavoces do PSOE e Agroma Sober, dous veciños de Neiras e o técnico municipal de Urbanismo.
|
|
|
|
|
|