|
|
NOVAS |
O ALCALDE DE SOBER CHAMA Á TRANQUILIDADE E AGRADECE A COLABORACIÓN PARA SOFOCAR UN INCENDIO EN ALLO E SAN MARTIÑO
O rexedor do Concello de Sober, Luis Fernández Guitián, fai unha chamada á tranquilidade despois de que fora controlado o incendio que esta mesma tarde se declarou na parroquia de Anllo e que afectou a Anllo San Estevo e Anllo San Martiño.
O alcalde lamenta os momentos de tensión que se viviron, pola proximidade a varias casas e por un estado do vento que complicou a actuación dos equipos de extinción.
O rexedor estivo desde primeira hora no lugar do incendio apoiando o traballo do axente forestal ao mando, Felipe Castro. Ao mesmo tempo, o Concello mobilizou a súa motobomba desde o primeiro momento.
“Estamos tranquilos e satisfeitos por ter controlado o lume no menor tempo posible e desde aquí quero dar as grazas a Felipe Castro, aos efectivos e aos veciños e veciñas que axudaron na extinción do lume”, explica.
O incendio iniciouse ás 18:09 horas e a superficie afectada, segundo estimacións provisionais, sitúase arredor das 15 hectáreas. Na súa extinción traballan 3 axentes forestais, 8 brigadas, 4 motobombas e 1 pá.
|
|
|
|
|
|