NOVAS DO CONCELLO

NOVAS SOBER ACOLLE MAÑÁ UNHA XORNADA SOBRE AS CLAVES PARA VENDER MÁIS E MELLOR O VIÑO O Concello de Sober e a Estación de Viticultura e Enoloxía de Galicia (EVEGA) colaboran na organización da xornada Claves para vender máis e mellor o viño. Estratexias de marketing no viño que se celebra mañá no Centro Sociocultural da localidade no marco do Mes do Amandi, as actividades previas á celebración da XXXV Feira do Viño de Amandi.   Programa A xornada comeza ás nove da mañá coa entrega da documentación aos asistentes. De seguido, o director de Maleta Hand Wines, Dionisio Oseira, falará sobre a análise do contorno competitivo no sector do viño. Estratexia e competitividade no mundo do viño.   Ás 10:30 horas a profesora da Facultade de Empresariais e Turismo da Universidade de Vigo, María de la Curz del Río, pronunciará un relatorio sobre Enoturismo. Unha alternativa estratéxica no sector do viño.   Ás once, despois dunha pausa-café, o xefe do departamento de deseño da empresa galega Coretti, Manuel Deza, falará sobre a importancia da embalaxe na venda do viño. Factores que cómpre ter en conta.   Ás 11:45 horas o director xeral da Fundación Observatorio Español do Mercado do Viño (OEMV), Rafael del Rey, pronunciará unha charla sobre os Freos ao consumo do viño, os potenciais aceleradores, o mercado internacional do viño e o consumo do viño en España.   A xornada remata cunha mesa redonda da que formarán parte todos os relatores, moderada por Alfonso Losada Quiroga.   Destinatarios A xornada, que conta con 100 prazas, está pensada para viticultores, adegueiros, enólogos, persoal técnico das adegas e dos consellos reguladores, persoal investigador interesado no tema, estudantes e público en xeral.   Obxectivos O alcalde de Sober, Luis Fernández Guitián, explica que a xornada pretende remarcar a importancia do marketing no mundo do viño, así como dispor dun estudo do mercado do viño a nivel nacional e internacional. Tamén se van dar a coñecer novos argumentos e estratexias de venda ao tempo que se incidirá na importancia do enoturismo como estratexia de promoción e venda.