NOVAS DO CONCELLO

NOVAS O ALCALDE DE SOBER AFIRMA QUE A INTERNACIONALIZACIÓN DO VIÑO DE AMANDI É IMPARABLE O Concello de Sober deu a coñecer hoxe no miradoiro de Santiorxo as actividades que conforman o Mes do Amandi, así como un avance da programación de XXXV Feira do Viño de Amandi e o cartel anunciador, froito dun concurso de debuxo do que resultou gañadora a monfortina Andrea Rodríguez López. Está previsto que participen na Feira 22 adegas. Este ano o convidado de honra será o Concello de A Teixeira.   No acto estiveron o alcalde de Sober, Luis Fernández Guitián, e a Corporación local, a xefa territorial de Turismo, o presidente do Consello Regulador e o presidente e a xerente do Consorcio de Turismo, así como os adegueiros que van participar na Feira.   Fernández Guitián agradeceu aos colleiteiros que traballan nas adegas e nas viñas todo o ano para sacar ao mercado un produto excepcional “que cada vez é demandado en máis países. A internacionalización do viño de Amandi en particular, e do da Ribeira Sacra en xeral, é imparable”, afirmou.   Mes do Amandi A primeira das actividades desenvolverase do 4 ao 8 de marzo, días nos que o Goberno local instalará un stand promocional do Concello de Sober e da XXXV Feira do Viño de Amandi na mostra gastronómica Xantar, en Expourense. O día 8 haberá unha degustación de viño de Amandi con galo de curral de Vila de Cruces.   O venres día 6 de marzo os participantes na actividade infantil de animación á lectura ‘Merendas con contos’ farán unha visita a unha das adegas de Amandi onde poderán coñecer o proceso de elaboración do viño.   O Concello organiza en colaboración coas Xuventudes Musicais de Sober un concerto de arpa a cargo de Olga Benito para o día 14 de marzo no Centro Sociocultural de Sober. Ao remate farase unha degustación de viño de Amandi.   Outra das colaboración é a que o Goberno local establece coa Estación de viticultura e enoloxía de Galicia con quen organiza a xornada técnica Claves para vender máis e mellor o viño. Marketing do viño, prevista para o 18 de marzo en horario de 09:00 a 14:30 horas.   O domingo día 22 de marzo o programa Come e fala da Radio Galega fará a súa retransmisión en directo desde a Praza do Concello de Sober para darlle publicidade á Feira e contar os segredos da localidade.   Os actos do mes do Amandi rematan o 25 de marzo, día no que a Escola de Hostalería de Rosende acollerá unha xornada de maridaxe de viño de Amandi con merluza do pincho de Celeiro. No evento colaboran a Escola de Hostalería da Fundación Belarmino Fenrández, Puerto de Celeiro S.A. e a Confraría de Pescadores de Celeiro.   Avance do programa da XXXV Feira do Viño de Amandi A XXXV Feira do Viño de Amandi comezará o sábado día 28 de marzo ás 11:30 horas co disparo de bombas de palenque. Ás doce terá lugar a apertura oficial do evento a cargo de Adega Malcavada en lembranza do seu fundador, Antonio Vázquez.   Ás 12:15 actuará o Grupo de Música Tradicional do Agadic e entre as 16.30 e as 19:00 horas o espazo da Televisión de Galicia Aquí Galicia retransmitirá en directo o seu programa desde a Praza do Concello, no que haberá entrevistas actuacións de orquestras e humoristas, entre outras actividades.   Logo do programa haberá unha actuación da Banda de Música de Sober e da charanga Madialeva.   Ás 17:30 horas dará comezo e precata oficial na sala de catas do Centro Sociocultural de Sober. Xa pola noite, a partir das 22:00 horas haberá unha actuación do grupo Os Festicultores.   Desde o sábado 28 e ata o día 15 de abril o Centro Sociocultural acollerá unha mostra cos carteis que participaron no concurso do que saíu a imaxe anunciadora da Feira, así como dos debuxos que se anotaron ao certame de adhesivos para nenos e nenas da Comarca.   Domingo 29 de abril O domingo a actividade retómase ás 10:30 horas co disparo de 22 bombas de palenque, unha por cada colleiteiro participante. De seguido haberá unha actuación da Charanga NBA. Ás 11:00 horas a Banda de Música de Sober fará un pasarrúas.   Ás 11:30 horas comezará a cata oficial na sala de catas do Centro Sociocultural de Sober. Á mesma hora terá lugar a misa solemne coa bendición de ramos na Igrexa de Sober. A continuación farase a lectura do pregón, cuxo pregoeiro se avanzará nos próximos días, así como a entrega de premios aos adegueiros.   Pola tarde volverá actuar a Charanga NBA. A Orquestra Los Satélites será a encargada de pechar a Feira do viño de Amandi a partir das 19:30 horas.   O comité de cata estará formado polos seguintes membros: -Mar Vilanova De La Torre, investigadora da Misión Bioloxica de Galicia (CSIF). Grupo de investigación de viticultura. -Iria Otero Mazoy, membro da Asociación de Sumiliers Gallaecia. -Fernando Vilariño Páxaro, técnico do Comité de Cata da D.O. Rías Baixas. -Josá María Martínez Alonso, membro do panel de cata da D.O. Ribeira Sacra e propietario da vinoteca “O Beiro” de Santiago. -David Cidre Guitián, profesor do ciclo formativo de Servizos en Restauración da Escola de Hostalería Belarmino Fernández Iglesias de Rosende-Sober.   Listado de adegas participantes na XXXV Feira do Viño de Amandi:   A MAN DE PRADO BOLMENTE AS MURAS PROENDOS ADEGA ALGUEIRA DOADE ADEGA BARBADO PROENDOS CIVIDADE OUTEIRO-BOLMENTE CRUCEIRO VLACHA-DOADE DÉCIMA VILACHA-DOADE DON BERNARDINO CIMA DE VILA-BROSMOS ESTRELA VILACHA-DOADE GUÍMARO SANMIL-BROSMOS LUCENZA CORVELLE-PROENDOS MALCAVADA ROSENDE MARCELINO I A CARQUEIXA-PROENDOS PROENCIA SANSILLAO-PROENDOS RECTORAL DE AMANDI AMANDI REGINA VIARUM DOADE SURGA I LOBIOS VAL DA LENDA CANTON-AMANDI VIÑA FERREIRO CAMILO-BOLMENTE VIÑA CAZOGA O PACIO-AMANDI VIÑA PEON O BARRIO-FIGUEIROÁ VIÑA REGUEIRAL A CAL-BARANTES