ROSA QUINTANA VISITOU HOXE UN SOUTO DE CASTIÑEIROS EN NOGUEIRA E A FINCA EXPERIMENTAL DE OS CHANCÍS
A conselleira do Medio Rural e do Mar visitou hoxe a unha plantación de castiñeiros situada no monte de Nogueira e pertencente á comunidade de montes de Santo Estevo de Anllo, do concello lugués de Sober. Durante a visita, a titular de Medio Rural e Mar destacou que este souto de castiñeiros constitúe un exemplo de posta en valor do noso monte, neste caso para a produción e a comercialización da castaña en Galicia.
Ademais contribúe á diversificación da produción forestal e ao aproveitamento dos recursos do monte aumentando a superficie forestal arborada e diminuíndo o risco de incendios forestais. A maiores engadiu que proxectos coma este promoven o impulso da economía e a fixación de emprego no rural.
A superficie que comprende a plantación é de máis de 12 hectáreas e está prevista para 1.247 plantas de castiñeiro híbrido inxertado. Ademais esta iniciativa comprende traballos de roza, de arreglo da pista, inxertado e fertilización, entre outros e contou cunha subvención da Consellería do Medio Rural e do Mar de máis de 16.000 euros.
A Consellería do Medio Rural e do Mar leva aprobadas actuacións de creación e recuperación de soutos de castiñeiros en máis de 400 hectáreas. Estas actuacións enmárcase dentro das axudas para o fomento de primeira forestación de terras non agrícolas e supoñen unha inversión por parte da Consellería de preto de 580.000 euros. Además, á convocatoria deste ano, que será resolta proximamente, a Consellería do Medio Rural e do Mar destinou 6,6 millóns de euros.
Finca experimental de viñedo
Tras visitar o souto de castiñeiros, Rosa Quintana, visitará a finca experimental Os Chancís, tamén no concello de Sober. Esta finca é un proxecto concebido con fins experimentais, educativos e de mantemento da biodiversidade e da paisaxe, que se centran principalmente no coñecemento da adaptación de variedades autóctonas á subzona de Amandi dentro da Denominación de Orixe Ribeira Sacra e no estudo das características agronómicas e enolóxicas de variedades autóctonas en relación coa altitude, a exposición da parcela , e co efecto de diferentes portaenxertos.
O deseño experimental proposto para a parcela experimental Os Chancís é axeitado aos requirimentos da zona e aos obxectivos sinalados para o proxecto. Por isto deséñanse ensaios coas variedades Mencía, Brancellao, Sousón, Treixadura e Loureira, todas elas amparadas na D.O. Ribeira Sacra.
|